اسلام آباد۔24نومبر(اے پی پی) نگران وفاقی وزیر خارجہ جلیل عباس جیلانی آکھیے غزہ تے فلسطین دی صورتحال ٻہوں اوکھی اے اتھاں تھیوݨ آلی تباہی دی ایں توں پہلے کݙاہیں کوئی مثال نی ملدی ، اسرائیل جنگی جرائم دا مرتکب تھیندا پئے ، غزہ اچ خانداناں دے خاندان ختم تھی چکئن ، پاکستان دی حکومت مسئلہ فلسطین دے حل اتے فلسطینی عوام دی اوکھ مکاوݨ کیتے آپݨا کردار ادا کریندی رہسی ۔ سینیٹ اجلاس اچ سینیٹر مشتاق احمد دے توجہ ݙیواؤ نوٹس دے جواب اچ نگران وزیر خارجہ جلیل عباس جیلانی آکھیے غزہ اتے فلسطین دی صورتحال ٻہوں اوکھی اے ، پچھلے عرصے اچ اتھاں جیڑھی تباہی تھئی اے ایندی کوئی مثال نی ملدی ، 18 ہزار توں ودھ شہادتاں تے 40 ہزار توں ودھ زخمی ہن ، غزہ تقریبا تباہ تھی چکیے ۔ انہاں آکھیے اسرائیل جنگی جرائم دا مرتکب تھیندا پئے پاکستان انہاں کجھ ملکاں اچ شامل اے جنہاں اسرائیلی ظلم کوں نسل کشی قرارݙتے ، دنیا کوں ایں مسئلے تے توجہ کرݨی چاہیدی اے ۔ انہاں آکھیے خانداناں دے خاندان غزہ اچ ختم تھی چکئن لکھاں ٻال بے یار و مددگار ہن، حماس کنے اسرائیل دے 250 قیدی جݙاں جو 7 ہزار توں ودھ فلسطینی قیدی اسرائیل کنے ہن، جنگ بندی دے معاہدے دے تحت اسرائیل 150 فلسطینی اتے حماس 50 اسرائیلی یرغمالیاں کوں چھوڑ ݙیسی ۔ انہاں آکھیے اسرائیل اتے عالمی برادری تے جیڑھا دباؤ پاتا ڳئے ایںدا نتیجہ وی سامݨے آئے تے قطر جیڑھا کردار ادا کیتے اے او آئی سی دیاں کوششاں دا ہی رد عمل اے۔ وزیر خارجہ آکھیے غزہ دی صورتحال تے مغربی ملک اسرائیل دے بیانیہ کوں نی منیندے پئے تے پوری دنیا اچ تھیوݨ آلے وݙے پیمانے تے مظاہرے ایندا ثبوت ہن، ہݨ فلسطین دا مسئلہ مرکزی حیثیت اختیار کر چکے۔
